انا السودانى

أنا ودأصول كل الخلوق عارفاني ..
وكت الدم يفور مين البيتحداني ..
ثابت فوق جذور متمدي لي جيراني .
ذي ماالنيل وصل وصلت ملت شرياني . ذي ماالدين دخل دخلت ملت وجداني .

قايم مختلف ماذي ولادا تاني .
في اللون والسلوك المارقو بره كياني .
زولا في الخلوق واضح براي وحداني .
ذي شمس النهار كل الخلوق شايفاني .
ذي قمر القرى كل الخلوق رايداني . ذي عيد من فجر عين الصغار حارساني .
والزول البدور يعرف عقيدة ايماني .
مؤمن بالاله المن نعيمو أداني.

والزول البدور يعرف قبيلتي انا ياني .
مليان بالعفاف حب التراب خلاني .
مليان بالفهم حب البشر عباني .
طرت من القيود رب العباد ختاني .
فوق كل الخلوق راقد مكوع هاني .
خالف للكراع ماسك السحاب الداني .
نازل للارض تلقاني شيتا ضاوي .
ثابت فوق رجول شايلات عضايا وناوي . لي باكر بصل مهما اذتني بلاوي ..

من رجلي اليمين افريقي دما راوي .
والحيل البشيل حيلا نصيح دينكاوي .
مليان للعضام بدم نضيف شلكاوي .
انواكي ونويري ومورلي بي زانداوي . في الاخر رجل زولا اصيل نيلاوي .

من رجلي الشمال عربي وعديل صحراوي .
من عند الحزام عرقا شديدا لاوي .
جينات السلام دي الليها مين بيلاوي .
بذرات اللقاح انسانه مالي تقاوي . طلعت فد اصل جابتني زول سوداوي .
يوم كل الخلوق صبحت عديل مابياني .
والسيد في الخلوق لزه الرقيق عافاني .
والفهم اللفي خلا القرار يأذاني .
والخير الكتير الداخرو جوه كياني .
عبه اعضاي شعور بي زول اصيل حقاني .
ثابت ذي شجر وسط الرياح تلقاني . مابملك جنس غير ما أنا السوداني ..

من يدي اليمين ساعد نصيح بجاوي .
تدخل في اصابعي تشوفني زول هاوساوي .
جوه رشايدي ماخد من طبع عرباوي .
فلاتي وشمالي الكل صبح شرقاوي . من غير الصباع أنا يدي شن بتساوي ..

من يدي الشمال ساعد بناها خلاوي .
مليان للعضام دما منابعو زغاوي .
مليان للمسام بزول اصيل فوراوي .
بقاري وتعايشي وزول أصيل نوباوي .
في الاصل الوحيد انا يدي يد غرباوي . من غير الصباع انا يدي شن بتساوي ..

من كتفي الشمال منصوري بي نماري .
شايل شيل نمر جعلي وملهلبه ناري .
رباطابي ان نضم بجرح شعور حقاري .
والكتف اتقفل شايقي وكمان هواري .
مخترق العنق مالي العروق افكاري .
لي كتفي اليمين محسي وكمان دنقالي .
حلفاوي انقسم يوم جاني سدا عالي .
سكوتي وبديري وماخطر في بالي غير كتفين دوام يتلاقو ابقى شمالي ..

بالع كم لغات من حلقي وصلت قاشي .
مليان بالسلام بكره غبيا فاشي .
في بطني الغريقة أنا شكري لا كباشي .شايل كوم قبايل وماتعبت وماشي ..

القلب النضيف شايل التعدد صافي .
للجيهة ام ضمير دايما يقول عوافي .
والعين للجميع نظرا تشوفبو خرافي .
والراس للجميع عقلا مجيه وافي .
والقول الطلع مارق مرادي الخافي .
يارب ياجسد ان شاءالله بطنك دافي .
سارح في المصير يارب يجيني المافي .
في بحر الصراع يارب يدوم مقدافي .
نوصل للسلام في برو نلقى مرافئ .
والعضو ينقطع وين العلاج الشافي .؟
ماطالا الجسد من دونو يمحى أوصافي . والدور البقومبو محال بيصبح كافي ...

انا السوداني ود العز والاصول كل الخلوق رايداني
ابداااااع يا كابتن

~~مشكووووووووووووور الاخ مجاهد~~

الله عليك ياااملك.....تثلم يا أصلي!!!!!!!!

مصطفي عباس كتب:: الله عليك ياااملك.....تثلم يا أصلي!!!!!!!!

وتتواصل الابداعات من قبل الكابتن حفظك الله تقبل مروري